Fandriampahalemana

Partagé sur :
• facebook

Ny sabotsy maraina teo dia mpivady avy nangalatra nivarotra ireo entana avy nangalariny tratran’ny fokonolona no niharan’ny fitsaram-bahoaka tao Ambalamanasy,

fokontany midorehitra mena amin’ny tsy filaminam-bahoaka ao Toamasina ka maty tsy tra-drano ilay rangahy raha mbola avotry ny polisin’ny FIP teo am-pidarohana azy kosa ilay ramatoa vadiny ka mbola mitsabo tena eo anivon’ny hopitaly be ankehitriny. Raha ny angom-baovao avy amin’ireo andrimasom-ponolona ao Ambalamanasy izay tena efa leo ny hafitsok’ireo andian-jiolahy mamaky ny trano sy ny fivarotan’izy ireo, dia nitrangana famakiana ity fivarotana iray mivarotra zava-pisotro. Hagagana ny an’ilay tompony ny maraina nahita ity fivarotany vaky. Nanangom-baovao tamin’ny manodidina ilay tompon’ny fivarotana ka teo no nahalalana fa misy mpivady tsy miasa tsy misy zavatra atao tsikaritry ny olona mivarotra zava-pisotro ao an-trano. Nataon’ny fokonolona ny fanadihadiana sy ny fanaraha-maso ary ny fisavana ny trano. Tratra tao amin’izy mivady ireto avokoa ny zava-pisotro avy nangalarin’izy ireo ny alin’ny zoma tao amin’ity mpivarotra ity. Tsy nisy alaharo fa avy hatrany daroka sy ny vely kibay no nahazo ilay rangahy sy ny vadiny. Tranga iray hafa koa no niseho teo akaikin’ireto trano fandihizana sy fisotroana roa malaza eo akaikin’ny bazary may Ankirihiry. Tovolahy iray malaza efa mpanendaka no matin’ny olona raha nanendaka ny findain’ity mpampanofa tena iray miasa eo anoloan’ireo trano fandihizana ireo.

Rakoutou

Tia Tanindrazana

Samia mijoro ho an'i Gasikara.