Fandriampahalemana

Mpitandro ny filaminana Misy romoromo ny polisy sy miaramila..

Fandriampahalemana
Talata 18 Septambra 2018

Miha mangatsiaka ny fifandraisana eo amin’ny miaramila sy ny polisy taorian’ny nahafaty ny olon’ny Capsat tetsy Anosibe.

Raha ny fanazavan’ny naman’ny maty dia olona efa nibaboka io miaramila io kanefa mbola novonoina ihany. Tsiahivina fa tafiditra tao anatina andian-jiolahy voalaza fa nikasa ny hanao fanafihana mitam-piadiana ny 11 eptambra teo io miaramila io ary tsy nanao fanamiana. Tsy vao izao fa efa nisy tranga maromaro nahatonga tsy fifankahazoana eo amin’ny samy mpitandro ny filaminana ary mitranga avy eo ny fifanilihana andraikitra satria samy miaro ny olony. Mazàna moa dia tsy mety fantatra mazava izay tena marina, satria ny olona voarohirohy rahateo maty voatifitra. Ho an’ireo polisy nanontaniana, milaza fa manao ny asany tahaka ny mahazatra amin’ny fikarohana jiolahy izy ireo, ka rehefa misy ny fifanenjehana, ireo jiolahy rahateo miaraka amin’ny fitaovam-piadiana dia tsy maintsy miaro tena ary mitifitra ny polisy. Etsy an-kilan’izay, maro no mihevitra ny hoe : f’angaha dia tena tsy maintsy vonoina ho faty izay jiolahy rehetra henjehina. Rehefa maty mantsy izy ireo dia mifarana eo ny fanadihadiana ka tsy fantatra izay mbola mpiray tsikombakomba aminy. Ny mampanahy amin’ity fifandraisana miha mangatsiaka amin’ny samy mpitandro ny filaminana ity dia efa ho avy izao ny fampielezan-kevitra, hiatrika fifidianana ny Malagasy koa raha ireo natao hiaro ny vahoaka indray no tsy mifanaraka koa tsy hanararaotra tahaka ny banga mihomehy amin’ny alina ve ny jiolahy ? Tsapa amin’izao tranga izao ihany koa fa misy zavatra tsy maintsy alamina eo anivon’ny mpitandro ny filaminana Malagasy satria matetika no handrenesana hoe miaramila, zandary ary polisy misy tafiditra amina asan-jiolahy, fanafihana na fakana an-keriny. Ny basy moa dia efa tsy fantatra intsony izay fanaraha-maso any anaty lakazerina any fa dia feno kalachnikov eraky ny tanàna. Toa tsapa amin’ny zava-mitraga sy ny resaka mivoaka etsy sy eroa fa mivaha ny fanarahana ny fitsipi-pitondran-tena ary mety tsy ampy ny fanaraha-maso eo anivon’ny mpitandro ny filaminana Malagasy.

RTT