Fandriampahalemana

Lemaka Ambohibary sy Mandrosohasina Mirongatra ny hala-bary an-tanimbary

Fandriampahalemana
Alarobia 16 Mey 2018

Tsy misy hiainana mihitsy ny tantsaha any ambanivohitra fa raha tsy mifandona amin’ny dahalo dia miady amin’ny mpijinja vary an-tanimbary ihany koa. Velon-taraina mantsy ny tantsaha amin’iny lemaka Ambohibary sy Mandrosohasina iny fa tsy mandry an-tanàna mihitsy ny vatan-dehilahy amin’ny alina fa miandry vary eny an-tanimbary indray izao.

Efa manomboka hojinjaina mantsy ny vary any an-toerana satria tsy mbola tena fararano tanteraka, ka izay tsy miambina dia ny mpangalatra no tonga aloha. Efa maro no lasibatra raha ny tatitra avy tany an-toerana ary mbola mitohy izany. Tsy tena jinjaina toy ireny fanaon’ny tantsaha ireny moa no ataon’ny mpangalatra, hoy ny loharanom-baovao fa laingosany, izany hoe ilay salohim-bary avy hatrany no jinjain’ireo mpangalatra. Tsy hitan’ny olona intsony izay hitarainana satria efa ho lava sy maro ny karazana tsy fandriampahalemana any ambanivohitra ka dia ny miambina sisa no azo atao ary mitatitra ny zava-misy fotsiny.

Caius R