Fandriampahalemana

Jiolahy mpamono ben’ny tanàna Lavon’ny zandary tao Analavory

Fandriampahalemana
Alatsinainy 20 Novambra 2017

Jiolahy miisa 5 mpanao fanafihana mitam-piadiana no tra-tehaky ny zandarimariam-pirenena avy ao Analavory ny 12, 13 ary 15 novambra lasa teo, ka ny 4 azo sambo-belona fa ny iray kosa maty.

Nandositra izy ka nitifitra ny zandary rehefa tsy nety nijanona. Ny 12 novambra 2017, dia nidina tany Borikely distrikan’i Tsiroanomandindy ny zandary raha nandre fa misitrika ao amin’io toerana io ny iray tamin’ireo jiolahy nikapa famaky ka nahafaty ilay zazalahy 17 taona tao Ambohitratoandro, kaominina Analavory ny alin’ny 5 novambra teo. Izy io avy eo no nanoro ny namany roalahy hafa izay voasambotra tany Ampizarantany, kaominina ambanivohitra Bemahatazana, distrikan’i Tsiroanomandidy ihany ny marainan’ny 15 novambra teo. Samy niaiky ny anton-diany tamin’io fotoana io saingy raiki-tahotra indray rehefa nahita an’ilay zazalahy maty voakapan’ny iray tamin’izy ireo famaky ka nandositra tsy naka ninoninona. Ny raharaha faharoa dia ny nahalavo an’i Fealoza Faly jiolahy raindahiny ny 15 novambra teo tao Ankonabe, kaominina Analavory hatrany. Ny 13 novambra teo moa no voasambotra tao Tsarazaza ny ny naman’izy ireo iray saika hanafika mpandraharaha iray tany Ampefy (chute de la Lilly) tamin’ny volana oktobra lasa teo. Izy io no nasaina niantso an’i Fealoza ka nahalalana fa efa hiazo an’Analavory ity farany hamonjy ny fandevenana an’i Letsivery, iray tamin’ireo jiolahy namono ny ben’ny tanànan’Ampefy. Nanao ny vela-pandrika ny zandary ka voasakana ny fiara nitondra azy. Rehefa nasaina nidina izy dia nandositra avy hatrany. Niezaka ny hampijanona azy im-betsaka tamin’ny feo avo ihany ny mpitandro ny filaminana saingy tsy nanaiky izy ka voatery nitifitra ary nahalavo azy. Ity jiolahy ity moa dia efa nokarohana efa ela. Ankoatra ny halatra omby fanaony, lehibena fikambanan-jiolahy koa izy. Izy no nitarika ireo jiolahy tamin’ny famonoana ny ben’ny tanànan’Ampefy sy Andolofotsy dia izy ihany koa no nitarika ny ankamaroan’ny fanafihana tany amin’ny faritra Itasy sy Bongolava iny hatrizay, raha ny fampitam-baovaon’ny zandary hatrany.

J. Mirija