Fandriampahalemana

ITAOSY Mirongatra ny vaky trano

Fandriampahalemana
Talata 12 Martsa 2019

Tsy vitsy ireo mponina tonga mitaraina amin’ny tomponandraikitra eny an-toerana, indrindra amin’ny fokontany mahakasika ireo izay lasibatry ny vaky trano, indrindra ny lakozia sy ny tsena ambany rihana izay tsy misy mpatory.

Lehilahy iray 36 taona ary no voasambotry ny Polisy miasa ao amin’ny “CSP Itaosy” ny alahady lasa teo tokony ho tamin’ny 12 ora alina saika hanatanteraka famakiana trano. Ny namany kosa niditra elankelan-trano nanararaotra ny andro maizina ka nanjavona. Io alin’ny 10 marsa hifoha alatsinainy io, teny amin’ny faritra Bemasoandro Itaosy iny nandritra ny fisafoana nataon’ny mpitandro filaminana dia nahazo antso tamin’ireo andromasompokonolona ny Polisy fa misy tovolahy miisa roa tsy mazava mihaodihaody eny an-toerana. Tonga ara-potoana noho izany ireo tompon’andraikitra ka vantany vao nahatazana azy ireo ny mpanao ratsy dia niezaka nitsoaka . Tsy lasa lavitra ny iray dia tratra fa ny namany hafa kosa tafaporitsaka, arak any loharanom-baovaon’ny Polisim-pirenena. Mbola nahatrarana fitaovana fanongotana fantsika tahaka ny “bar pince” sy antsy ary fanapahana vy “pince coupante » lehibe teny aminy nandritra ny fisamborana azy. Fantatra fa nieritreritra ny hanatanteraka asa ratsy teny amin’iny toerana iny izy ireo dia izao nifanehitra tamin’ny Polisy izao. Natolotra ny fampanoavana omaly 11 martsa ny raharaha. Mahavelombolo ny mponina ny mahita ny fahatongavana ara-potoana ho an’ny mpitandro filaminana tahaka izao.

Haja Nirina