Fandriampahalemana

Herisetra sy asan-jiolahy Nisy naka an-keriny ny zanak’i Chandarana

Fandriampahalemana
Alatsinainy 04 Jona 2018

Nisy naka an-keriny teny Andakana-Ambohidratrimo amin’iny lalam-pirenena faha-4 mihazo an’i Mahajanga, akaikin’ny toeram-pilalaovana Golf iny ny teratany Karana antsoina hoe Rishi Chandarana omaly, izay zanaka lahin’ny tompon’ny hotely lehibe Le Grand Mellis etsy Tsaralalana.

Tokony ho tamin’ny 4 ora tolakandro no nitrangan’izany omaly. Fianakaviana Indianina manana ny maha izy azy ny fianakaviana Chandarana. Ampahatsiahivina fa ny 7 jona 2017 lasa teo no nisy naka an-keriny ihany koa i Pradeep Chandarana, rain’ity karana vao nisy naka an-keriny ity, roa andro monja taorian’ny nahavotsotra an’i Yanish Ismael anisan’ny fakana an-keriny nalaza teto amintsika. Izao tratra izao ihany koa ny zanany, herintaona latsaka 3 andro aty aoriana. Raha hiverenana ny tantara, nivoaka ny tranony i Pradeep Chandarana ary saika hamonjy ny fiarany nijanona teo akaikin’ny tobin-tsolika teo Behoririka no nosamborin’ny 3 lahy nisaron-tava sy nirongo basy, izay nitondra « moto ». Nakarin’izy ireo teo ambonin’ilay « moto “, ka noterena teo afovoany tamin’ny alalan’ny taingin-telo. Miverina indray izany ny fakana an-keriny. Vao ny takarivan’ny 24 mey teo ihany koa no nisy nisambotra teny Ampasampito akaikin’ny Gamo ny karana iray antsoina hoe Navage Veldjee. Izy ihany no nalainy fa navelany teo ny vadiny. Misy ifandraisany amin’ny politika indray ve izao zava-miseho izao ? Ny azo antoka aloha dia volabe no mihodina ao anatin’ny raharaha fakana an-keriny.

Toky R