Fandriampahalemana

Fiara tratry ny tifitra variraraka Olona 1 maty, 5 naratra mafy

Fandriampahalemana
Alarobia 08 Aogositra 2018

Olona 1 maty, ary 5 naratra mafy vokatry ny fanafihan-dahalo mpanakan-dalana tamin’iny lalam-pirenena RN1 Bis teo Anakalo lalana mampitohy an'i Tsiroanomandidy amin'i Maintirano.

Omaly maraina tokony ho tamin’ny 8 ora no voatafika ny fiara tsy mataho-dalana iray nitondra mpiasan’ny orinasa mpitrandraka solika Madagascar Oil, izay notsenain’ireo dahalo tamin’ny tifitra variraraka. Basy mahery mihitsy no nampiasaina, ka raha ny diam-bala maromaro niantefa tamin’ny fiara, dia basy “kalachnikov” no nampiasaina, tahaka ireny an’ny mpitandro ny filaminana ireny. Naratra mafy koa ny zandary roa tamin’ireo telo izay niaro ny mpandeha tao anatin’ilay fiara. Tsy nijanona ny mpamily fa nanohy ny diany faran’izay maika raha tsy izany dia matin’ny tifitra teo ireo olona tao anatiny.
Tsy andro tsy alina intsony ity asan-jiolahy ity ary na an-tanàn-dehibe na ambanivohitra samy mihorohoro. Tsiahivina hatrany fa anisan’ny vaindohan-draharaha sy iraka ampanaovina ny governemanta tarihin’ny praiminisitra Ntsay Christian ny fametrahana fandriampahalemana, saingy mbola lavitry ny kitay aloha ny afo hatreto.

Toky R