Fandriampahalemana

Faritra Itasy Misedra olana ny tantsaha

Fandriampahalemana
Alarobia 16 Janoary 2019

Mikaikaika ny tantsaha any amin’ny faritra Itasy noho ny tsy fandriampahalemana, indrindra tamin’ny taona 2018 lasa iny.

Manjaka tanteraka ny asan-dahalo ary mahakivy ny mpamboly sy mpiompy izany. Ankoatra izay, mamotika ny toekaren’ny faritra ihany koa ny fahapotehan’ny lalana amin’izao ary sahirana ny tantsaha mamoaka ny vokatra. Miteraka fidinan’ny vidim-bokatra izany ka miteraka fahasahiranana sy fahantran’ny tantsaha. Manankarena ny faritra Itasy ary tena tokony handroso be amin’ny sehatra fambolena sy fiompiana, hoy i Andry Rakotondravoavy nisolotena ireo tantsaha. Manantena ny fanatanterahana ny vina IEM sy ny velirano nataon’ny filoham-pirenena vaovao ny tantsaha, hoy izy hamahana haingana ireo olana lehibe ireo. Miandrandra ny fampandrosoana eny ifotony mihitsy ihany koa ny vahoaka ka mila tanterahina sy atao mafy ny fitsinjaram-pahefana. Ity farany izay tena ilana vola be tokoa raha tena hirosoana ary mbola olana hatrany ny tetibola mivangongo hatrany any amin’ny minisitera.

Tsirinasolo