Fandriampahalemana

Fanafihana tany Est Vinany Lasa ny basy sy ny vola rehetra

Fandriampahalemana
Alatsinainy 19 Oktobra 2020

Mpandraharaha iray mipetraka sy monina ao amin'ny Fokontany Est Vinany any Ambositra, toerana fantatra amin’ny hoe: ampitan'ny Tany Malalaka, notafihan'ny dahalo mitam-basy ny sabotsy alina tamin'ny 12 ora sy sasany teo ho eo, raha ny vaovao azo.

Lasan'ireo olon-dratsy ny vola tao an-trano, izay tsy fantatra mazava ny isany. Lasany ihany koa ny basy fiarovan-tenan'ilay tompon-trano. Tsy nisy naratra, tsy nisy aina nafoy. Tonga teny an-toerana ny Zandary avy amin'ny Borigady Ambositra sy ny Polisy avy ao amin'ny DRSP Amoron'i Mania saingy efa lasa ireo Dahalo. Omaly maraina ihany koa dia tonga teo ny Ekipan'ny Zandary miaraka amin'ny alika mpitsongo, dia saingy efa voahosihosy ilay toerana dia mety handiso ny fanaraha-dian'ilay alika ka tsy afaka natao ilay izy, ny tompontrano rahateo miompy alika ihany koa. Mitohy kosa anefa ny fanadihadiana ataon'ireo mpitandro filaminana ireo mikasika ity raharaha ity, hoy izy ireo. Isan’ny mety ho hirika ny fisian’ny taim-bala latsaka, izay balana kalaky, misy laharana ny bala mety afahana ny nipoirany, indrindra sanatria avy amin’ny mpitandro filaminana.

Toky R