Fandriampahalemana

Fanafihan-jiolahy Olona roa maty voatifitra, telo naratra

Fandriampahalemana
Talata 09 Jolay 2019

Nisehoana asan-jiolahy indray tao amin’ny distrikan’i Miandrivazo, ka nahafatesana sy nandratrana olona.

Roa no maty voatifitra ary telo naratra mafy izay mbola manaraka fitsaboana ao amin’ny tobim-pahasalamana ao Miandrivazo amin’izao. Omaly vao mangiran-dratsy no nisehoan’io fanafihana io, tao amin’ny fokontany Betanatanana, kaomina sy distrikan’i Miandrivazo, faritra Menabe. Andian-jiolahy tsy fantatra isa, nirongo basim-borona sy kalaky ary famaky no tonga nanafika ity tokatrano iray, izay misy fianakaviana dimy.

Nitaky ny vola sy firavaka sarobidy ireo mpanafika. Tsy nahafa-po azy ireo ny zavatra azony, ka ombin-tsarety roa tao am-bala no nentin’izy ireo. Nidina tany an-toerana ny mpitandro ny filaminana ary nanokatra ny fanadihadiana sy ny fikarohana ireo olon-dratsy. Andrasana ny mety ho tohin’ity raharaha ity.

Sitraka r.