Fandriampahalemana

Fampandrian-tany tany Ambanja Polisy iray no namoy ny ainy

Fandriampahalemana
Alatsinainy 27 Aprily 2020

Polisy iray no namoy ny ainy tany Antsifatra Analabe, distrikan’Ambanja taorian’ny ratra mafy nahazo azy nandritra ny hetsika fampandrian-tany nataony.

Polisy ihany ihany koa no maratra mafy ankehitriny niaraka tamina olon-tsotra iray. Raha tsiahivina kely dia ny 25 aprily lasa teo izy ireo no namita iraka tany Antsifatra, nahitana polisy efa-dahy. Nisy resaka fanondranana an-tsokosoko cannabis mantsy tany amin’ny faritra iny, vaovao voarain’ny kaomisarian’ny polisy any Ambanja. Niaraka tamina mpitari-dalana mahay tsara iny faritra iny izy nandritra izany. Rehefa tonga tany an-toerana anefa izy ireo dia tsy nahatratra intsony ireo mpanao ratsy izay efa lasa nitsoaka niaraka tamin’ireo hazany. Na izany aza dia nihaona tamin’ny sefom-pokontany ao Antsifatra izy ireo niaraka tamin’ny olona manodidina ny 20 isa teo. Nandritra izany anefa no nisy ny mpamadika ka nahatafalatsaka ireo polisy roa tao anatin’ny fandrika izay niteraka fahafatesana ho an’ilay iray mihitsy. Efa mandeha moa ny fanadihadiana ifotony mikasika ity raharaha ity amin’izao fotoana izao. Ho an’ilay polisy namoy ny ainy kosa dia fantatra fa any Mandritsara no handevenana ny nofo mangatsiakany.

Pati