Fandriampahalemana

Beravina Morafenobe Avotra ireo mpianaka nataon'ny dahalo takalonaina

Fandriampahalemana
Alatsinainy 24 Aogositra 2020

Avotra ireo takalonaina miisa roa, tafaverina avokoa ny omby telo voaroba. Notafihin’ny dahalo mirongo basy tao Mahavelona Fokontany Ampoza Beravina ny harivan'ny 20 aogositra 2020.

0mby miisa telo, lamba sy firavaka sarobidy ary vola mitentina enina hetsy Ariary no norobain'ireo dahalo tamin’izany ary naka takalonaina roa izy ireo hampihorohoroana sy hanakanana ireo mpanaradia. Nanao ara-dia avy hatrany ny Zandary avy ao amin’ny « Poste Avancé » Ankalalo, nitarika ireo Fokonolona tany an-toerana. Nisy ihany koa Zandary avy ao amin’ny kompania Morafenobe niainga tao Beravina hamonjy ny kizo tany Ankaramenabe ary nanao toy izany koa ny zandary tao Akondromena sy ny Tafika ZRPS hisakanana ireto dahalo ireto tao Ambonara sy hamonjena ny takalonaina. Ny zoma 21 aogositra maraina vao tratra tao Mamoladahy Marotahalaka any Soaloka Distrikan'i Miandrivazo ireo dahalo. Nisy avy hatrany ny fifampitifirana ka vaky nandositra ireo dahalo. Avotra soa aman-tsara ireo takalonaina roa toy izany koa ireo omby halatra telo.

Nangonin’i Jean D.