Fandriampahalemana

Asan-dahalo tany Alarobia-Bemaha Omby 20 tamin’ny 29 no tafaverina

Fandriampahalemana
Talata 19 Jona 2018

Nitrangana asan-dahalo indray tany amin’ny kaominina Alarobia-Bemaha ny alin’ny alahady hifoha ny alatsinainy 18 jona 2018, tao amin’ny toerana antsoina hoe Ampasatokana fokontany Ambohijafy, kaominina Bemaha Betafo.

Ty mbola alina loatra no nahatongavan’ireo dahalo niisa Roapolo, nirongo fitaovam-piadiana tao an-tanàna ka omby niisa 29 no lasan’izy ireo. Tsy nanohitra ireo mponina saingy rehefa lasa ireo dahalo dia nifamory ny mponina ka niantso zandary avy hatrany. Ny alin’ny alatsinainy tokony ho tamin’ny 11 ora alina dia nahazo antso ny zandary ka nidina avy hatrany tany an-toerana nanatevina ny fanarahan-dia niaraka tamin’ny fokonolona. Tafaverin’ny fokonolona sy ny zandary ny omby 20, satria raikitra ny fifandonana teo amin’izy ireo sy ny dahalo. Ankoatra izay dia azo antoka fa nisy dahalo iray naratra ihany koa nentin’ireo namany nitsoaka saingy tavela kosa ny basy vita gasy iray nampiasainy. Mbola mitohy ny fanarahan-dia ireo dahalo amin’izao fotoana, manaraka ireo omby 9 hafa sy ireo dahalo.

Caius R