Fandriampahalemana

Partagé sur :
• facebook

Hita teny Ambohitsimeloka, Ambohidratrimo Anosiala omaly hariva Razafindrazaka Hiancy, tovovavikely vao 6 taona nisy naka an-keriny teny Ambodivary Ambohitrarahaba.

 Nisy nahita tany anaty kirihitr’ala izy ary naterina avy hatrany teny amin' ny biraon'ny zandary teny an-toerana. Nahitana kitapo kely teny aminy ary nisy voamaso roa tao anatin'ilay kitapo, voamaso izay heverina fa an’ilay anadahiny. Raha hiverenana ny zava-nitranga talohan’izao dia nisy zaza mianadahy zanaka olona miasa amina fikambanana iraisam-pirenena iray eto Antananarivo monina eny Ambodivary Ambohitrarahaba. Tsy mianatra izy ireo amin'izao ka napetraky ny ray aman-dreniny tao an-trano noho izy mivady miasa.

Famaky sy antsy

Nony tonga anefa ny hariva tokony tamin' ny 4 ora rehefa avy niasa izy ireo dia taitra nahita ny vavahady zara fa nihidy, ary talanjona nijery ny "rideau" tao amin' ny efitrano fatorian' ireo ankizy toa tsy misokatra. Niditra ny trano izy ireo ka nahita ny fatin'ny zanany lahimatoa nifatotra amin’ny tadin'ny akanjon'ny mamany ary efa tsy nisy aina intsony. 12 taona izy, zokin’i Hiancy. Famaky sy antsy no namonoana azy, tena tamin'ny fomba feno habibiana tokoa.  Raha ny nambaran’ny mpitsabo tonga nizaha ny razana dia tokony ho tamin' ny 10 ora maraina no tapitra ny ainy ary efa nanomboka mafy ny vatana mangatsiakany io hariva io. Tsy fantatra ny anton’izao vono olona sy fakana an-keriny izao, indrindra ny dikan’ilay voamaso roa tao anaty kitapo. Efa misy ny vaovao voarainay ary mandeha ny fikarohana, hoy ny zandarimariam-pirenena raha nantsoina an-telefaonina halina ka ho hita eo ny tena marina. Raha ny resaka mandeha dia nanana olana tamin’ny mpanampy tao an-trano ka nandroaka io mpanampy io izy mivady mialoha izao loza nitranga izao.

Toky R

Tia Tanindrazana

Samia mijoro ho an'i Gasikara.