Fandriampahalemana

Ambohiboromanga-Ambatondrazaka 4 mianaka indray novonoin’ny dahalo

Fandriampahalemana
Alakamisy 26 Jolay 2018

Olona miisa 4 no indray matin’ny dahalo tany amin’ny kaominina Ambohiboromanga any amin’ny distrikan’Ambatondrazaka ny talata teo tokony ho tamin’ny 8 ora alina.

Mpianakavy avokoa izy ireo ary tao anatin’ny fanafihana dia tokantrano 4 no nasesin’ireo jiolahy tao amin’ny fokontany nisy azy ireo tao amin’ny fokontanin’i Feramanga Atsimo. Ny lefitra faharoan’ny ben’ny tanànan’Ambohiboromanga sy ny rahalahiny ary ny ray aman-dreniny ireo namoy ny ainy ireo. Notifirina sy notetehina zava-maranitra iry voalohany. Nentina nivoaka ny tanàna kosa ny vadin’io tompon’andraikitra io sy ny anabaviny, ary novetavetain’ireo dahalo. Ny tena nampiahiahy dia tsy nitady vola na entana sarobidy izy ireo fa ny basy tao an-trano no re fa tena nokarohany mafy. Nilaza ho tsy mila ny omby sy ny vola ireo jiolahy. Nambarany kosa fa efa fifanarahana vita ny azy sy izay mety ho naniraka, raha ny fanazavan’ny lasibatra. Izany “operation tsy mitsitsy” izany no nambaran’ireo olon-dratsy fa tanterahiny.

Toky R