Actualités

Partagé sur :
• facebook

Nampisavorovoro ny mponina ao amin'ny fokontany Antsirinala, kaominina Ambohibary, distrikan'i Moramanga ny fisian’ny tetikasa fananganana andrimby na “pylône” ao an-tanàna.

Namory ireo fokonolona sy ny tompon’andraikitry ny orinasa teo an-tokotanin'ny biraom-pokontany ny 5 aprily teo, nanazavana ny antom-pijoroan'ity “pylône” ity saingy tsy nanaiky ireo vahoaka tonga teo fa ny hanesorana avy hatrany ny fotodrafitrasa no notakian'izy ireo. Mitsipaka ny hitoeran'io fotodrafitrasa io ihany koa ireo mpandala ny fomban-drazana noho ny fanotorana sy famefena ny tsangambato hajain'izy ireo. Anisan'ny nanamafy orina ny fitakian'ireo vahoaka izany. Niezaka ny hanamboatra ny sain'ireo mponina ny tompon'andraiki-panjakana tonga teo saingy niafara tamin'ny tabataban'ny olona. Rehefa izay dia nanao fanambarana ny Ben'ny tanàna fa haato vonjimaika ny asa rehetra. Nisy anefa ireo komity najoro handinika ny raharaha ka ahitana ny avy eo amin'ny fokonolona sy ny mpitondra ary ny orinasa. “Pylône” manana haavo 40 metatra no hajoro. Tamin'ny 22 novambra 2016 no nahazo ny fahazoan-dalana hananganana ny fotodrafitrasa ny orinasa. Fifanarahan'ilay orinasa sy ny tompon'ilay tany no nentina nanatanterahana ny asa, tsy nisy fierana na fakana ny hevitr'ireo fokonolona, ka izay no niteraka ny olana. Ny 23 novambra 2016 dia efa nanao fanohanana ireo fokonolona dia izao mbola nitohy izao.

Nangonin’i Jean D.

Tia Tanindrazana

Samia mijoro ho an'i Gasikara.