Actualités

Partagé sur :
• facebook

Firenena 34 ankehitirny no voakasiky ny fiparitahan’ny tsimokaretina Zika, araka ny tatitry ny fikambanana iraisam-pirenena momba ny fahalasalamana.

Mba ho famerana ny fiparitahan’ity aretina azo avy amin’ny kaikitry ny moka ity dia saika miatrika fivoriana maika avokoa ireo firenena lehibe any Eoropa sy Amerika. Anisan’ny firenena tena voakasik’ity aretina ateraky ny otrikaretina Zika ity ihany koa i Martinika izay efa nahitana tranga hatrany amin’ny 2 287 hatramin’ny omaly. Raha amin’ny endrika ivelany dia tsy dia ahitana soritr’aretina mampatahotra loatra izy fa eo amin’ny vehivavy mitondra vohoka kosa no tena atahorana ny vokany ho an’ny zazakely ao an-kibo. Ny aretina aterany mantsy dia manimba ny ny fitomboan’ny atidohan’ny zazakely any an-kibo ka izany no mahatonga ny firenena any Eoropa tsy mampirisika mihitsy ny vehivavy hitondra vohoka. Araka ny fanadihadiana vita tany Etazonia mantsy dia mifindra amin’ny alalan’ny firaisana ara-nofo ihany koa ity aretina ity. Ny tena mahalasa saina kosa dia ny tsy fahatairan’ny fanjakana malagasy amin’ny fandraisana fanapahan-kevitra mba hisorohana  ny mety hidiran’ity aretina ity eto amintsika sy ny fiparitahany na dia mba ho fampahafantarana fotsiny aza. Mampatsiahy ny zava-nisy tamin’ny vanim-potoana niparitahan’ny aretina ebola ity tranga ity fa ny irariana dia ny mba tsy hahaela loatra ny fandraisan’ny minisiteran’ny Fahasalamana fanapahan-kevitra.

Andry Ratovo

Tia Tanindrazana

Samia mijoro ho an'i Gasikara.