Actualités

Trano miorina etsy Anosy Nandefa taratasy fitarainana ireo mpivarotra voninkazo

Actualités
Alakamisy 11 Aprily 2019

Tafiditra ao anatin’ny tsenan’Ambohijatovo ny tsenam-boninkazo etsy Anosy. Nanana olana anefa ireo mpivarotra ao an-toerana nanomboka ny 23 martsa alina lasa teo.

Nisy olona tsy fantatra nanangana trano hazo hanaovana toeram-pivarotana hanimasaka mantsy manoloana azy ireo izay manakona ny tsenany tanteraka. Raha araka ny fanazavan-dRtoa Mamy solontenan’ireo mpivaro-boninkazo omaly dia efa hitan’ny lehiben’ny tsena io trano miorina io, tsy mbola mahafantatra kosa ny kaominina fa vao nampahalalain’izy ireo. Tsy maintsy nandefa taratasy fitarainana eny anivon’ny kaominina mantsy izy ireo saingy tsy nisy valiny. Ankehitriny, efa madiva ho vita ny asa na dia amin’ny andro alina hatrany aza no hanaovan’ny tompony azy. Efa misy jiro miampita mankao amin’ilay trano ary mamaramparana ny ao anatiny sisa ilay mpanao trano izay marihina fa tsy miseho tava ihany koa fa mikatona ao anaty trano ao noho ny tahony ireo mpivarotra. Miantso ny tokony hijeren’ny kaominina akaiky ity tranga mahazo ireo mpivaro-boninkazo etsy Anosy ity izy ireo. Nomarihin-dRtoa Mamy hatrany fa olon-tsotra no milaza ho tompon’ilay tany nanorenana ny trano ary efa nanala mpivarotra ranom-boankazo teny an-toerana io olona io.

Pati