Actualités

Partagé sur :
• facebook

Raha ny fanazavana azo, olona mpivahiny nangataka tany tamin’ireo olobe teo an-tanàna no niandohan’ny tantara. Taty aoriana, rehefa maty io olona io, dia nilaza ny taranany (R.J.B ) fa izy no tompon’ny tany, satria efa novidian-drainy roa alina ariary monja ny tanàna iray manontolo, ny taona 1978.

     Mitohy ary niverina indray ny olana ara-tany mirefy 32a 38sa ifanolanan’ny vahoaka ao Mahavatse II (Villa Papohako TF n° 4333-CJ ) sy R.J.B  (mitonona tompon’ny tany vaovao ankehitriny), ka trano an-jatony maro no tsy maintsy hoesorina, ary olona 900 no tsy hanan-kialofana. Nanoloana izany, naneho ny hatezerany ireo fokonolona ka nitokona teo amin’ny biraon’ny fokontany Mahavatse II sady nametraka sorabaventy (eo amin’ny sary), ary namantsika ity biraom-panjakana ity mba ho fanairana ny sain’ny tompon’andraikitra mahefa. “ Tsy ekenay ny fanaovana tsinontsinona ny foko Vezo. Tsy matoky intsony ny fitsarana izahay, ary misy minisitra mialoka manao tsindry bokotra ambadik’izao fanesorana anay izao, ka mila vahaolana matotra raisin’ny  mpitondra izahay mba tsy hisian’ny ra mandriaka, satria tsy hiala amin’ny taninay sy tanànanay mihitsy izahay tompon-tany  na inon-kidona na inon-kihatra “, hoy ireo vahoaka. Nomarihan’ireo fokonolona fa efa nisy ny fitsarana an’ity ady tany ifanolanana ity ny faran’ny volana aprily 2015, ary foana ny fanesorana an’ireo olona tena tompon-tany tamin’izany, raha noroahina tamin’ny taniny ny 24 aprily 2015. Ny faran’ny herinandro teo anefa, nisy nanambara teny an-toerana fa hisy indray ny fitsarana hatao ny 15 martsa ho avy izao, amin’ny tsy maintsy hanesorana an’ireo olona iray tanàna, fa ilain’ny tompony ny tany, ary amidiny amin’olona ambony, ka io no nampitroatra ny hatezeram-bahoaka.

Eric R.

Tia Tanindrazana

Samia mijoro ho an'i Gasikara.