Actualités

Partagé sur :
• facebook

Ny zoma faha-30 septembre 2016 no ivon’ny fankalazana sady famaranana ny fankalazana ny faha-55 taonan’ny Polisim-pirenena Malagasy, ka samy nanana ny hetsika nentiny nanamarika izany ny Polisy isaky ny Faritany.

 Anisan’izay nisongadina indrindra tamin’ny hetsika niseho teto Antananarivo misy ny foibe fitantanana ny polisim-pirenena ny fitokanana ny tsangambaton’ny faha-55 taona izay nialohavan’ny hazakazaka fanehoana firaisankina nanodidina ny farihin’Anosy ny maraina ka nandraisan’ny sampandraharaha sy polisy teto Antananarivo rehetra anjara, ary nialohan’ny lanonam-pikoranana (Nuit de la Police Nationale) notanterahina teny Ivato ka nentina nanakatona tanteraka ity fankalazana ity. Marihina kosa fa ny alakamisy 29 septembre 2016, teny amin’ny Cercle Messe-n’ny Polisy ANTANIMORA, dia nisy ny fihaonambe Nasionalin’ny Fikambanan’ny Vadin’ny Polisy sy ny Vehivavy Polisy notarihan’ny Vadin’ny Minisitry ny Filaminam-bahoaka.  Betsaka ny vitan’ny Polisim-pirenena tamin’ny fampanjakana ny filaminana nandritra izay 55 taona izay, hoy ny minisitry ny Filaminam-bahoaka, ny Contrôleur Général de Police Anandra Norbert nefa betsaka ihany koa ny mbola miandry. Ny Praiminisitra, lehiben’ny Governemanta kosa dia nankahery sy namporisika ny Polisim-pirenena mba hiroso sy hanao ny tsaratsara kokoa hatrany amin’ny fampanjakana ny fandriampahalemana mba hahafahan’ny vahoaka miasa sy mamokatra handrosoan’ny Firenena.

Ntsoavina Evariste

Tia Tanindrazana

Samia mijoro ho an'i Gasikara.