Actualités

Orinasa afaka haba may teny Tanjombato Mpiambina iray no maty, olona 2.000 no mety ho very asa

Actualités
Alarobia 14 Novambra 2018

Lehilahy iray teratany vahiny, lehiben’ny mpiambina ao amin’ny orinasa afaka haba OCM nirehitra ny alatsinainy alina teo no fantatra fa namoy ny ainy noho ny hasemporana nahazo azy.

Mpiasa mihoatra ny 2.000 isa kosa no mety ho very asa, izay marihina fa misy mpivady ny ankamaroany ka nampitaraina fatratra azy ireo. Mbola nasain’ilay teratany sinoa tompon’ilay orinasa niverina avokoa mantsy izy ireo omaly maraina. Nisy anefa ireo nahazo filazana avy hatrany fa tsy maintsy miato amin’ny asany aloha. Misy kosa ireo mbola miverina indray anio alarobia. Anisan’ny orinasa goavana mpanamboatra lamba eto amintsika ity may ity toy ny atin’akanjo ho an’ny vehivavy izay hahavitan’izy ireo roa kaontenera mirefy 12 metatra isanisany aondrana mankany ivelany isan-kerinandro. Raha ny fanazavan’ny sampana mpamonjy voina dia olana ara-teknika teo anivon’ny orinasa no nahatonga ny firehetana ka nahamaizan’ny tranon’ny Filatex nofain’izy ireo. Niainga tamina kitay ny afo, niampita tamina lamba nivangongo ary niafara teny amin’ny valindrihana ka tsy voafehy intsony. Mbola nisy donak’afo teny an-toerana omaly antoandro. Tsiahivina fa tafakatra hatramin’ny 40 isa ireo trano may teto an-drenivohitra tato anatin’ny roa volana ka teny amin’ny faritra iva no tena betsaka niharany.

Pati