Actualités

Olom-panjakana manao propagandy Mampitandrina ny Praiminisitra

Actualités
Zoma 12 Oktobra 2018

Namoaka fanambarana sy fampahatsiahivana ny Praiminisitra omaly 11 oktobra ny amin’ny tokony hanajana ireo voalazan’ny andininy faha-57 ny lalàna fehizoro 2018-008 mifehy ny ny fifidianana sy ny fitsapan-kevi-bahoaka,

indrindra ny maha zava-dehibe ny fanajana ny soatoavina Malagasy dia ny Firaisam-pirenena sy ny Fihavanana. Tsy tokony hisy ny fifampihantsiana sy fifandrangitana eo amin’ireo samy kandidà sy ny mpomba azy, ary tokony hotandrovana mandrakariva ny filaminam-bahoaka, hoy izy. Manome toromarika ireo solontenam-panjakana isan-tsokajiny koa ny praiminisitra ny amin’ny handraisana andraikitra feno ao anatin’ny tsy fitanilana, ka hitandrovana ny zon’ny kandidà rehetra tsy ankanavaka ho afaka haneho hevitra an-kalalahana ary tsy voatohintohina mba hisorohana ny mety hisian’ny korontana any amin’ny faritra iadidian’izy ireo tsirairay avy. Voararan’ny lalàna moa ny fanaovana fampielezan-kevitra ho an’ireo tompon’andraikitra ambony, voatendry tamin’ny alalan’ny didim-pitondrana sy ny didim-panjakana, saingy mahagaga sy mampametra-panontaniana ihany hoe : fampielezan-kevitra ary azo atao sa tsia no ataon’ny vehivavy iray mpanolotsaina ny Praiminisitra miteny sy manenjika kandida amina haino aman-jery ? Voafehiny ve ny mpikamban’ny governemanta sa samy manao izay hampandany ny kandidany ?

Toky R