Actualités

Mpikambana HAFARI Nitory ilay karana nampiditra am-ponja ny filohany

Actualités
Talata 26 Martsa 2019

Tsy hanaiky hatramin’ny farany ireo mpikambana eo anivon’ny HAFARI Malagasy.

Taorian’ny nahafantaran’izy ireo ny marina rehetra mikasika ny tany etsy Anosizato dia nitory ilay karana nampiditra ny filohan’izy ireo Rafanomezantsoa Jean Nirina eny am-ponja izy ireo. Eny anivon’ny lehiben’ny fampanoavana mihitsy no nanateran’izy ireo ny fitoriana. Nandefasana taratasy fitarainana ihany koa ny eo anivon’ny fiadidian’ny repoblika. Ho azy ireo mantsy dia fanampenam-bava tsy hivoahan’ny marina no antony nampidirana ny filohany eny am-ponja. Tsiahivina fa efa nisy ny fotoana nampiatoan’ny fanjakana ny asa fanamboarana fotodrafitrasa teny amin’io kianja filalaovam-baolina Anosizato io. Ankehitriny, misy milaza fa misy manao asa an-tsokosoko indray ao an-toerana koa iantsoan’izy ireo ny tompon’andraikitra. Mikasika ny fisamboran’ny zandary eny Betongolo ny filohan’ny HAFARI tamin’ny naha-talen’ny fampielezan-kevitry ny kandida filoham-pirenena iray azy moa dia fantatra fa nahazo fahafahana madiodio ny tenany, didy nivoaka tamin’ny 19 martsa lasa teo.

Marigny sy Pati