Actualités

Mpiasan'ny Jirama mitsirika kaontera Tsy maintsy manana taratasy mazava

Actualités
Sabotsy 23 Aprily 2016

Betsaka ireo olona mitaraina noho ny afitsok'ireo mpiasan'ny Jirama tonga mijery kaontera any an-trano amin'izao fotoana izao.

Tsy mijanona ho indray mandeha isam-bolana mantsy izany fa efa mahatratra in'efatra isam-bolana mihitsy ho an'ny faritra sasany eto an-drenivohitra, araka ny fitarainana voaray. Raha ny fanadihadiana natao teo anivon'ny Jirama dia nambaran-dRandrianarison Feno tompon'andraikitry ny serasera ao aminy fa tsy mandeha matetika any an-tranon'olona izany ireo tena mpiasan'ny Jirama fa misy fotoanany. Tokony hanana “ordre de mission” na taratasy mazava maniraka azy ireo hanao io asa io ihany koa izy ireny, hoy izy ary zon'ny tompon-trano ny mitaky sy mijery izany vao mampandroso azy, miaraka amin'ny “badge” manamarika fa mpiasan'ny Jirama marina izy. Mampitandrina ireo tokantrano lalovan'ireo milaza ho mpiasan'ny Jirama matetika ity tompon'andraikitra ity sao sanatria sendra ny mpisoloky. Ekena fa afaka misava kaontera ny mpiasan'ny Jirama saingy tampoka izany ho an'ireo faritra hahenoana fitarainana misy mangala-drano na jiro ankoatra ireo lalovan’ny fisavana toy ny mahazatra.

Pati