Actualités

Partagé sur :
• facebook

Taorian’ny fiarahan’izy ireo nirodorodo teny amin’ny fitsarana ny alatsinainy lasa teo, dia nitohy tamin’ny alalan’ny fanaovana fitokonana teny amin’ny Esplanade teny Ambohitsaina indray ny hetsiky ny mpianatra ao amin’ny Sampana Fitsaboana eny amin’ny oniversiten’Antananarivo omaly.

 Raha tsiahivina, tsy ankasitrahan’izy ireo hatramin’ny farany ny fampiakarana fitsarana ireo namany miisa 4 tafiditra ao anatin’ny raharaha nahafatesan’ilay ramatoa bevohoka teny amin’ny hopitaly Befelatanana, izay ambaran’ny mpitory fa vokatry ny antsirambina nataon’ny tao amin’ny hopitaly no antony. Tsy nijanona teo amin’ny Esplanade kosa anefa ny hetsik’ireo mpianatra fa nidina tany amin’ny Katedraly nisy ireo mpianatry rantsana fitsaboana tao amin’ny taona voalohany mba hamoaka azy ireo. Tsy nanaiky mora kosa ireto farany, izay nilaza ny hanohy ny fianarana mba hisorohana ny tsy fahavitan’ny fandaharam-pianarana,  ka dia raikitra ny fifamaliana, saingy tsy nisy zava-banona intsony ihany no niafarany noho ny kotaba. Fahita matetika eny amin’ny anjerimanontolo ny fandravana mpianatra rehefa misy ny hetsi-pitakiana, ka zary lasibatra hatrany ny hafa. Hitohy hatrany ny fitokonana raha tsy mbola hafahana madiodio ireo mpianatra, hoy ireo nitarika ny grevy  omaly. Raha ny vaovao omaly ihany, dia voalaza fa nanaovana fanadihadiana teny amin’ny sampandraharahan’ny mpitandro ny filaminana misahana ny ady heloka bevava ireo mpianatra voasaringotra ireo.

Toky R

Tia Tanindrazana

Samia mijoro ho an'i Gasikara.