Actualités

Partagé sur :
• facebook

Nankalaza ny fetin’ny Olomasina Odon ny Fiangonana Katolika maneran-tany, ka ny talata18 novambra 2014 no nanatanterahana izany teto amin’ny Diosezin’Antananarivo, no sady fankalazana ny tsingerintaona nahaterahan’ny Arseveka Odon Marie Arsène Razanakolona. Izay no tsy nahitana ity farany tamin’ilay dinika fakan-kevitra momba ny fampihavanam-pirenena nataon’ny FFKM io andro io teny Faravohitra

Tamin’ny alalan’ny lamesa lehibe tao amin’ny Katedraly Katolika Andohalo no nanatanterahana izany. Notronin’ireo Pretra sy Reliziozy ary Filankevitry ny Fiangonana Katolika rehetra manerana ny Diosezy. Maro ihany koa ny Kristianina tonga niaraka nanolotra izany vavaka izany ho an’ny lehiben’ny Fiangonana katolika eto amin’ny Diosezin’Antananarivo. Tonga nonotrona sy niaraka niombom-bavaka tao amin’ny Katedraly Andohalo ihany koa ireo olona manan-kaja sy mpitondra eto amin’ny Firenena. Singanina manokana eto ny fahitana ireo kandida ho Filoham-pirenena farany teo, toa an’i Jean Louis Robinson sy Patrick Raharimanana. Ity farany moa dia fantatra fa zanaka an-tranon’ny Fiangonana Katolika ary mety handray anjara amin’ny fikarakarana ny fihaonana an-tampony eto amin’ny firenena mba hisian’ny fampihavanam-pirenena. Nohamafisin’i Arseveka Odon Razanakolona tamin’ny teny nataony fa “tsy maintsy mifamela heloka satria samy diso avokoa, nefa tsy maintsy arahina fanoneran-keloka izany fa tsy vitan’ny hoe miova fo fotsiny”. Fantatra fa hitohy ny alahady tolakandro izao eny amin’ny Falda Antanimena izany fankalazana ny tsingerintaona izany, izay fety hiarahan’i Aresveka Odon Razanakolona amin’ireo Kristianina rehetra manerana ny Diosezin’Antananarivo.

Tia Tanindrazana

Samia mijoro ho an'i Gasikara.