Actualités

Matsubara sy ny tariny Hampahafantatra ny « Kay keny sound »

Actualités
Sabotsy 01 Desambra 2018

Nangingina tao ho ao ny mpanakanto Matsubara sy ny tariny. Nilaza ary ity mpihira manana ny lazany ity fa misy hatrany tokoa ny fandaharam-potoana isan-karazan’izy ireo saingy noho ny raharaham-pirenena dia naleo aloha nampandeferina ny ankamaroany.

Efa niarahanareo nahita tamin’ny fanamiana ireny, hoy izy, ny foto-kevitra “Kay keny” ary dia mahafaly ahy ny milaza aminareo sahady fa nahazo fanamafisam-peo vaovao raitra sy varatra be ny tarika ankehitriny ary nampitondraina ny anarana hoe “Kay keny sound”. Hikononkonona kely aloha izahay, hoy izy, mandrapahatapitr’ity taona ity ary dia hatomboka amin’ny fampahafantarana an’io ny taona vaovao. Efa fanamafisam-peo feno izay misy lampihazo, jiro, kamiao sy sprinter fitondrana ny artista hatramin’ny tranokely fiomanana na “loge”, hoy ny tenany, ity azon’ny tarika ity. Antony nanaovana azy dia satria manahirana ireo mpanakanto eto amintsika matetika ny mitady fanamafisam-peo feno. Mba hirosoana amin’ny maha matihanina kokoa sy hampihena ny fahasahiranan’ny mpanakanto, araka izany, hoy izy, dia ilaina ny fananana fanamafisam-peo feno toy ity izay ho ampahafantarina amin’ny fomba ofisialy tsy ho ela ity.

J. Mirija