Actualités

MANODIDINA IZAY HISEHO AO IAVOLOHA

Actualités
Alakamisy 08 Janoary 2015

Dia haresaka indray Iavoloha Fa ho ao `reo filoha teo aloha, Ary koa `reo filoham-piangonana `Zay nampisy ny fifanatonana.

Dia hiakatra indray `rony feo,

Sy kabary efa toa mankaleo.

Hilazàna an`ireo toky fitaka

Hampifaly sy mba hampibitaka.

Dia ho ao ny fampanantenana,

Sy ny lainga fandrenao mazàna.

Handokafana ireo kely vita

Sy ny lalana hahatafita.

Dia hampiesona ny fitondrana

Fa ho resiny ny fahantrana,

Ary hiakatra ny harin-karena

Ka hisondrotra ny firenena.

Nefa anie izy ireo `zay miteny

Ny hitsitsy dia fady azy ireny !

Fa dia `retsy vahoaka efa maina

No mizaka ny tsy eran`ny aina !

… Koa dia resaka ny ao Iavoloha.

Ny mpitondra no mila mifoha !

Efa reraka iretsy vahoaka,

Leon-kabary ka efa manoaka.

SEDERA RAVALISON (07-01-15)