Actualités

Mandoto - Vakinankaratra Trano 29 nodoran�ny dahalo, very ny omby 76

Actualités
Talata 13 Oktobra 2015

Traboina tsy manan-koraisina intsony ny mponina ao Malokila, vohitra iray any amin�ny Kaominina Vasiana, Distrikan�i Mandoto taorian�ny fanafihan-dahalo nitranga tao an-toerana ny tolakandron�ny zoma lasa teo.

Dahalo 15 lahy mirongo basy no niakatra tanàna amin’ny andro amin’ny 4 ora tolakandro. Nodoran’izy ireo avy hatrany ny tanàna nampihorohoroana ny mponina, ka trano 29 tafo no kila hotohoto. Lasan’ireo dahalo taorian’izay ny omby miisa 76 tao an-tanàna. Niraviravy tanana, tsy afa-nanoatra ny vahoaka nanoloana ny basy mahery vaika teny an-tanan’ireo dahalo. Tsy nisy ny aina nafoy na naratra, saingy miaina tebiteby ny mponina ao amin’ity tanàna ity, nafoy avokoa ny fananan’izy ireo izay nohariana an-taonany maro. Zato mahery no tsy manan-kialofana ao Malokila amin’izao. Ny vatan-dehilahy mbola any ampanarahan-dia ireo omby very miaraka amin’ny miaramila hatry ny omaly hariva nandraisana ny vaovao. Mitebiteby ny amin’izy ireo ny havany.