Actualités

Partagé sur :
• facebook

Novakian’ilay teratany kanadianina Gilles Filialtreault, tale jeneralin’ny Air Madagascar bantsilana ny tsy fahaiza-mitantan’ireo tompon’andraikitra teo aloha teo anivon’ity orinasam-panjakana ity nandritra ny fihaonambe niaraka tamin’ny mpiasa farany teo.

Tsy fanahy inian’ity tale jeneraly  ity ny nanao izany fa noho ny  famaliana ny fanontanian’ireo  mpiasa no nanomezany  valin-teny mazava  nampieritreritra.

Tsy hamaha olana akory

Rehefa natao mantsy, hono, ny fanadihadian’ny teknisianina malagasy dia hita indray  fa mety  tsy hamaha olana amin’ny  fahasahiranan’ny kaompania indray  ilay fiaramanidina boeing 737-800 ilay nalaina  tamin’ny fomba nakotrokotroka  tany Sina farany teo  satria tsy  ho afaka  mipetraka amin’ny seranam-piaramanidin’i Morondava, Toliara, Tolagnaro, Toamasina, Ste Marie akory ilay fiara noho ny habeny. Ny nanafarana azy ity anefa dia saika hoe hanatevenana ny zotra  anatiny  ankoatr’ireo zotra rejionaly  tokony hataony. Ny seranam-piaramanidin’i Mahajanga sy Nosy be ihany no afaka mandray ity fiara ity hatramin’izao. Raha  nanontanian’ireo mpiasa  amin’izay ary atoa tale jeneraly ny hoe inona no fanapahan-kevitra horaisina dia tsotra ny navaliny. « Vao tonga aho  ka tsy maintsy  mandinika aloha, zavatra izay  mba tokony ho  nataon’ny mpitondra teo alohako alohan’ny ( ndlr nitonatonana) na niditra nanofa ity  fiaramanidina tsy  mifanaraka amin’ny tena  filan’ny Air Madagasikara ity. Mety  haverina  any amin’ny  tompony indray ary ve izany  ity fiara ity ? Mandra-piandry izay tena vahaolana dia miketrika  mafy ny teknisianina malagasy ankehitriny ny hanomanana ity  fiaramanidina ity mba hanao zotra  mankany Gouangzhou saingy Atoa tale jeneraly ihany moa no tompon’ny  teny farany.

Olana hafa

Mbola  olana  ihany  fa  momba  ireo  ATR 72-600 roa izay ananantsika dia tsy mbola afaka  manao zotra rezionaly indray ireo  na dia nohafarana hanao izany asa izany aza satria rehefa  nanao ny fanaraha-maso  rehetra indray ny teknisianina malagasy dia nahita fa samy tsy manana « HF » avokoa  izy roa ireo  ka tsy  afaka  mbola mivoaka an’i Madagasikara aloha. Lafo anefa  ireo  fitaovana  ireo ka tsy  voavidin’ny Air Madagascar  hatramin’izao. Farany momba ireo mpitatitra ny mpiasan’ny kaompania dia niarahan’ny rehetra nahita  angamba  fa fiara mini-bus mazda no nampiasain’ny  orinasa  nitaterana ny mpiasa  hatramin’izay. Fito na valo volana lasa anefa izay dia niangentsana,  hono, ny  mpitantana ny orinasa tamin’izany  fotoana nanofa  fiara madinika hitatitra  sokajina mpiasa. Tena volabe mivoaka isan’andro anefa ny hofan’ireo fiara madinika ireo  nandritra ireny Air Madagasikara nanomboka sahirana ireny. Miharihary amin’ity tale  jeneraly vaovao  ity  avokoa izany ankehitriny.

Rabri  

Tia Tanindrazana

Samia mijoro ho an'i Gasikara.