Actualités

Lalao Ravalomanana “Ao anatin’ny 100 andro misy asa goavana vita”

Actualités
Talata 15 Janoary 2019

Tonga niarahaba ny Ben’ny tanànan’Antananarivo Renivohitra, Lalao Ravalomanana omaly ireo mpiara-miasa akaiky aminy noho ny fahatongavan’ny taona vaovao 2019.

Anisan’izany ireo lehiben’ny boriborintany miisa enina izay samy nanamafy ny fahavononany hampandroso ny tanàna mihoatra lavitra noho ny tamin’ny taon-dasa. Nambaran’ny Ben’ny tanàna Lalao Ravalomanana tamin’izany fa vonona ihany koa ny tenany hanao izay faraheriny mandrapahatapitry ny fotoam-piasany amin’ity taona 2019 ity. Asehontsika amin’ny vahoaka, hoy izy fa miasa ho azy ireo hatrany ny kaominina, antony nilazany fa tsy maintsy misy vokatra azo tsapain-tanana eny anivon’ny sampandraharaha tsirairay avy ato anatin’ny 100 andro. Ao anatin’ny firaisankina tanteraka no hanatanterahan’ireo mpiasan’ny kaominina Antananarivo Renivohitra izany ka anisan’ireny ny asa fanadiovan-tanàna hisorohana ny valan’aretina mety hiparitaka amin’izao fotoam-pahavaratra izao.