Actualités

Partagé sur :
• facebook

Anisan'ny voasokajy ho ambany ny taham-pahavitrihana tamin'ity fifidianana ity, ka ahiana tsy ho marin-toerana izay ho filoham-pirenena vaovao eo, raha ny salanisan'ireo olom-pirenena nandrotsa-bato no jerena, hoy ny eo anivon'ny fiarahamonim-pirenena manabe ny fifidianana (KMF-CNOE), satria hisy fiantraikany amin'ny maha ara-dalàna azy.

Maro ny lesoka tamin'ny fihodinana voalohany, indrindra teo amin'ny fanabeazana amin'ny fifidianana, satria misimisy ihany ny vato fotsy sy vato tsy manan-kery, hoy ny fanazavana. Ny vato tsy manan-kery dia azo hitarafana sahady ny tsy fahampiana fanabeazana, satria azo sokajiana ny tsy fahaizan'ilay mpifidy mikirakira ireo fitaovana ampiasaina mandritra ny androm-pifidianana. Ny vato fotsy indray dia ahitana ny fahatsapan'ilay olom-pirenena fa tsy mahafeno ny hetahetany ireo kandidà. Fanehoana ny safidy ihany ny fandatsahana an'ireo vato ireo, hoy ny teo anivon'ny KMF-CNOE, ka tokony hitondrana fanatsarana ao anatin'ny lalàm-pifidianana, indrindra ny fanomezan-danja ny vato fotsy. Hiditra amin'ny fihodinana faharoa ny fifidianana filohan'ny Repoblika, ka tokony hahay handanjalanja ny safidy ataony ny olom-pirenena ary ho tomponandraikitra amin'izany safidy izany fa tsy hailika amin'ny hafa sy amin’ny any ivelany. Mampirisika hatrany an’ireo olom-pirenena ny KMF-CNOE mba ho sahy hanatontosa ny andraikiny ary hampitombo hatrany ny taham-pahavitrihan'ny mpifidy amin'ny fifidianana manaraka eo.

Marigny A.

Tia Tanindrazana

Samia mijoro ho an'i Gasikara.