Actualités

Kaominina Ampitatafika Maniry fiaraha-miasa amin�ny fanjakana foibe

Actualités
Talata 06 Oktobra 2015

Tontosa omaly folakandro ny fifamindram-pitantanana teo anivon�ny kaominina ambanivohitra Ampitatafika.

Nizotra tao anatin’ny firahalahiana tanteraka ny lanonana teo amin’ny ben’ny tanàna mpisolo toerana Randrianarimanana Ralay sy ny ben’ny tanàna vaovao voafidim-bahoaka Ramparaoelina Rado. Niompana tamin’ny jery todika ny lahateny nifandimbiasan’ny roa tonta. Nasongadin’ny ben’ny tanàna vaovao kosa anefa ireo toetra tsy mendrika sy mamohehatra nitranga nandritra ny vanim-potoanan’ny fampielezankevitra. Anisan’ny niharan’ny antsojay tamin’ny fanaratsiana sy fanendrikendrehana tsy misy porofo mazava toy ny fanotofana tany niaraka tamin’ny fitoriana napetraka teny amin’ny Bianco moa ity ben’ny tanàna natolotry ny antoko Tiako I Madagasikara ity. Sarotra rahateo ny hamerina ny fifampitokisana eo amin’ireo mpandraharaha vonona ny hiara-kiombon’antoka amin’ny fampandrosoana ny kaominina taorian’ireny tranga mampalahelo ireny, hoy ny tenany. Ezahina anefa ny hanarina izany satria mila fampivoarana ireo fokontany miisa 13 mandrafitra ny kaominina. Vonona ny hiara-kiasa amin’ny fanjakana foibe tarihan’ny filoham-pirenena Rajaonarimampianina Hery moa ny kaominina ambanivohitra Ampitatafika. Hojerena avy hatrany ny sehatry ny fanabeazana amin’izao fidiran’ny mpianatra izao, araka ny fanampim-panazavan’ny ben’ny tanàna Ramparaoelina Rado.

Ramano F.