Actualités

Kaominina Alasora sy Carry le Rouet Frantsa Matotra ny fiaraha-miasa

Actualités
Alakamisy 28 Martsa 2019

Tao anatin`ny roa taona dia nisy fiaraha-miasa teo amin`ny kaominina Alasora sy ny kaominina Carry Le Rouet any Frantsa izay mampifandray mpianatra sy ankizy tanora ao anatin’ireo kaominina roa ireo.

Tamin`ny taon-dasa no nanomboka ny fiaraha-miasa izay nanaovana fifaninanana horonantsary fohy (film de poche) momba ny fiainan’ireo tanora any an-tokantranony na any am-pianarana na koa eny amin`ny fiarahamonina .Izy ireo no mamorona ny horonan-tsary. Tamin` ny taon-dasa, 20 ireo nifaninana ka 12 no nahazo loka. Tamin`izay fotoana izay, ny kaominina Alasora no nahazo ny loka voalohany. Nitohy tamin`ity taona ity ny fiaraha-miasa ka mbola lasan’ireo mpianatry ny lisea TASC Alasora ihany ny amboara. Omaly no nanolorana ny loka natrehin’ny Ben’ny tanàna Marc Ramiaranjatovo. Matotra ny fiaraha-miasa eo amin`ny kaominina roa tonta. Tsiahivina fa ny tanora no anisan`ny fanohitra afaka mitondra fampandrosoana ao anatin’ny firenena misy azy. Notohanan’ny kaominina hatrany izy ireo tamin’ny fanatontosany ireo horonantsary nofidiany. Tsy mijanona amin`ny fanabeazana sy ny tanora ihany fa mivelatra kokoa amin`ny fanatanterahana fotodrafitrasa ny fiaraha-miasan’ny kaominina roa tonta. Ho avy tsy ho ela ny boky, jiro, fiara… tsy ampiasain’ity kaominina iray any Frantsa ity intsony homena maimaimpoana ny kaominina Alasora.

Pati sy Marigny