Actualités

Partagé sur :
• facebook

Lehilahy roa 26 sy 18 taona mpanao fanafihana mitam-piadiana eny amin’iny faritra Ankorondrano sy ny manodidina iny no voasambotry ny

polisy avy ao amin’ny paositry ny polisy Antaniavo teny Antetezana afovoany Tsaramasay ny zoma lasa teo tokony ho tamin’ny 8 ora alina. Anisan’ireo dimy lahy nandray anjara tamin’ny fanafihana toeram-pivarotana iray teny Tsaramasay izy ireo ny 18 Aprily lasa teo nitondra basy P.A iray, sabatra sy lefona ary barre à pince. Nanao saron-tava ny roalahy tamin’ireo olon-dratsy ireo raha nanao fanamiana mpitandro ny filaminana ny iray. Nopitsohin’ireo olon-dratsy moramora ny varavarana ka efa tafiditra izy ireo vao taitra ireo dimy vavy tao an-trano. Norahonan’ireo jiolahy ny tompon-trano sady notereny hamoaka ny vola. Tsy namaly ireto farany  fa nanome ka lelavola mitentina 3 000 000Ar no azon’izy ireo tamin’izany. Mbola nalain’ireo olon-dratsy ihany koa ny ordi portable iray, finday miisa 5 sy vangovango 3 ary peratra mariazy miisa roa talohan’ny nandehanany nitsoaka. Tsy nanapoaka basy mihitsy ireto jiolahy ireto. Rehefa lasa ireo olon-dratsy vao nampandre ny polisy ny tompon-trano ka tonga teny an-toerana ireto farany. Nandeha ny fikarohana nataon’ny polisy ka ny zoma teo no voasambotra ny roalahy raha mbola karohina kosa ny namany telo ambiny. Natolotra ny Fampanoavana ny alatsinainy teo izy ireo ary naiditra am-ponja vonjimaika eny amin’ny Fonjaben’i Tsiafahy.

Pati

Tia Tanindrazana

Samia mijoro ho an'i Gasikara.