Actualités

Jean Nirina HAFARI Nafahan’ny fitsarana madiodio

Actualités
Alakamisy 09 Mey 2019

Nivoaka omaly ny didy momba ilay raharaha kianjan’Anosizato izay nitoriana karana mpanam-bola iray ny filoha nasionalin’ny fikambanana HAFARI Malagasy Rafanomezantsoa Jean Nirina.

Nafahan’ny fitsarana madiodio noho ny fisalasalana ity farany, rehefa notazonina vonjimaika teny am-ponja nandritra ny telo volana latsaka. Tsy nihatra ihany koa ilay onitra 60 tapitrisa Ar nangatahan’ilay karana. Nisaotra an’Andriamanitra feno ny filohan’ny HAFARI Malagasy noho izany. Nankasitraka tanteraka ny fitsarana ihany koa ny tenany noho ity ivontoerana iray ity izay tena andry hiankinan’ny malemy sy ny osa tokoa. Tsiahivina hatrany moa fa tamin’ny 26 aprily lasa teo no niakatra fitsarana ity filohan’ny HAFARI Malagasy ity sy ilay karana nitory azy. Taorian’izay no nahafantarana fa ho mpikarakara ilay tanàna entina hanomezana trano sy tany ireo tsy manana sisa no andraikitra hosahaniny ao anatin’ny fikambanana ankoatra ny fiahiana sy fitsinjovana manokana ireo zokiolona. Omeny horaisin’olon-kafa kosa ny resaka fiahiana ny zon’olombelona ao anatin’ny fikambanana.