Actualités

Fivoriamben’ny Firenena Mikambana Nolazaina fa namono olona 4000 ny zandary Malagasy

Actualités
Alarobia 25 Septambra 2019

Voaresaky ny ONG anankiray tao anatin’ny Fivoriamben’ny Firenena Mikambana na ny ONU tanterahina any New York Etazonia ny momba an’i Madagasikara.

Tao anatin’ny 5 taona dia nisy ny hetsika ara-miaramila nataon’ny zandarimariam-pirenena, ka namonoana olona ankitsirano hatrany amin’ny 4000 na “execution sommaire” tsy mandalo raharaham-pitsarana sy tsy misy fanajana zon’olombelona, raha ny nambaran’io ONG io. Ho an’ny volana aprily-jona 2019, dia tanàna maro tany Betroka no lasibatry ny fanafihana. Any amin’ireo toerana manan-karena harena an-kibon’ny tany, dia nambara fa nisy ny famonoana mba hahakivy ny olona hiala hahafaha-mitrandraka ny harena, hoy ny ankapoben’ny tatitra.

Tsy mitombina

Nandiso tanteraka izany kosa ny avy amin’ny zandarimariam-pirenena fa tsaho izany, raha ny nambaran’ny Kolonely Ravoavy Zafisambatra. Tsy nisy ny famoizana ain’olona afatsy ny mandritra ny fifandonana amin’ny dahalo. Tsy misy antony mihitsy hamonoana olona tsy manan-tsiny. Ny zandary dia manatanteraka ny asa fampandriana fahalemana no ataony any Atsimo, ary ao anatin’ny fanarahana tanteraka ny lalàna sy ny zon’olombelona.

Toky R