Actualités

Fitrandrahana ao Soamahamanina Tsy mbola nilavo lefona ny Sinoa

Actualités
Talata 11 Oktobra 2016

Mbola tsy tena nilavo lefona ka hamela tanteraka ny fitrandrahana ao Soamahamanina ny orinasa Sinoa Jiuxing Mines izay nanaisotra ny fitaovany aloha hatreto

. Amin'izao fotoana izao dia miandry ny vahaolana atolotry ny fanjakana izy ireo ary mikaroka izay mety ho marimaritra iraisana amin’ny mponina any an-toerana. Ambaran’ny eo anivon’ny seraseran’ny orinasa rahateo fa vonona hitondra fampandrosoana any an-toerana toy ny fanamboaran-dàlana, famatsiana herinaratra, fananganana tobim-pahasalamana ny Sinoa mba ho setrin’ny fahazoana mitrandraka. Isan’ny nanamafy ny tsy mbola fisitahana tanteraka ny Pr James Ratsimba omaly ka nilaza fa tsy mahatoky tanteraka ny fialan’ny Sinoa tao Soamahamanina ny tenany. Mety efa nisy fifanarahana ambadika natao tamin’ny « mafia » izao zava-misy izao, hoy izy. Tondroiny ho mety nohararaotin’ny mpanani-bohitra mbola te hanjanaka ihany koa ny zava-misy ka namendrofendroan’izy ireo ny mpitondra tamin’ny filazana hoe jereo ny Sinoa mangorona ny taninareo ary izy ireo indray no hiditra lalina rehefa voahilika ny sinoa ka isan’ny himasoana aloha ny lafiny politika toy ny fikarakarana fifidianana hametrahany ny olony. Mbola tantara mitohy ny raharaha Soamahamanina ary efa mandeha ny feo fa hiverina hitrandraka ny Sinoa aorian’ny Frankofonia.

Toky R.