Actualités

Partagé sur :
• facebook

Mety ho anisan'ny fototry ny olana tsy mampirindra ny asan'ny fanjakana ny tsy fisian`ny firaisankina satria tsy miray saina tsara ny ao anaty governemanta.

Farafahakeliny efa mivaky telo io governemanta Ntsay Christian io. Misy minisitra tena ekipan`ny filoha Rajoelina toa an`ireo  minisitry ny fanatanjahantena, ny mponina,  ny angovo, ny serasera sy ny kolontsaina, ohatra. Misy indray an'ny antoko Malagasy Miara Miainga (MMM), izay tarihin`ny minisitra Hajo Andrianainarivelo, izay misahana ny fanajariana ny tany. Manampy azy ny minisitry ny fampianarana ambony sy fikarohana ara-tsiansa,… Farany, misy ekipan'i Ntsay Christian. Tahaka ny hoe samy manana ny “patron”-ny ry zareo, dia izao no alehany. Misy fotoana mifanipaka mihitsy ny zavatra ambara, hany ka lasa ohatry ny hoe mbola fiaraha-mitantan'ny ankolafy telo  sa efatra tamin'ny tetezamita. Miankina kosa amin`ny finiavana politika ny fanatanterahana ny programa, indrindra ny fahavononana  satria izany no tsy ampy amin`ny fitondrana an`i Madagasikara. Raha afaka mametraka ekipa manana traikefa amin`ny sehatra rehetra ny filoha dia heverina ho vitany. Ny olana dia izay prezida tonga dia ohatry ny misy tompony kanefa raha filohan`ny Malagasy rehetra izy dia tokony halalaka ny fijereny ny olona hiasa hiaraka aminy. Ilaina ny fananana traikefa amin`ny fitantanana raharaham-panjakana. Miandrandra olona za-draharaha afaka manampy avy hatrany ny filoha. Miankina foana amin`ny finiavana politika ny zava-drehetra ary ny filoha no mahalala izay laharam-pahamehana kanefa tsy tokony hanadino ny filan`ny vahoaka. Na ny filoham-pirenena aza ve tsy efa mahatsapa hoe misy tsy alehany mihitsy ireto minisitra ireto ? Saingy tsy manala azy ireo izy satria hivadika fahavalo politika mialoha ny fotoana izay esorina eo dia mikatso ny asa.  

Marigny A.

Tia Tanindrazana

Samia mijoro ho an'i Gasikara.