Actualités

Partagé sur :
• facebook

Tsy nandefitra mihitsy ny tale jeneralin’ny DGGFPE na ny « Gestion Financière du Personnel de l’Etat », Ihanta Sahondra eo amin’ny tsy fanarahan-dalàna miseho eo amin’ny rafitra tantanany.

Notoriany, ny mpiasa iray antsoina hoe A.R. izay nisandoka ny anarany ka nahasoloky olona niisa 7 be izao. Nivoaka ny didy fanamelohana ka voaheloka higadra sazy mihatra 5 taona i A.R

Marihana fa tany amin’ny taona 2016 no nitranga ny fisolokiana nataon’ity mpiasan’ny DGGFPE iray ity izay nilaza fa afaka mampiditra mpiasa eo anivon’ny minisiteran’ny vola sy fitantanam-bola izy tamin’ny fampiasana ny anaran’ilay tale jeneraly. 200 000 000 tapitrisa ariary no totalin’ny vola voaangony nefa tsy nisy akory, volana maro taty aoriana, ilay fampidirana mpiasa fa nahita fialana bala hatrany ny lehilahy. Tsy niahiahy tamin’ny fisolokiana nitranga mihitsy ireo voasoloky raha tsy efa tsy hitan’izy ireo fa nanjavona tanteraka i A.R. ary tany Toamasina izy vao tratran’ny polisy tany an-toerana dia nampidirina vonjimaika teny Antanimora ary vita tamin’ity herinandro ity  ny fitsarana azy. Mbola misy fisolokiana hafa ihany koa ankehitriny mitranga eo anivon’ity DGGFPE  ity ka fikarakarana fitsapam-pahaizana na « test » an-tsoratra sy am-bava avy amin’ny antontan-taratasy hosoka indray no nampiasan’ireo mpisandoka andraikitra ho tompon’andraikitra ao amin’ity sampandraharaha ity. Efa eo am-pelatanan’ny tompon’andraikitra mahefa ny raharaha ka tsy handeferana tahaka ny nahazo an’i A.R. ihany koa.

Ntsoavina Evariste

Tia Tanindrazana

Samia mijoro ho an'i Gasikara.