Actualités

Fiompiana, jono ary fambolena Mpitsidika 30 000 no andrasana amin’ny tsenabe FEPA

Actualités
Sabotsy 23 Febroary 2019

Nampahafantarina omaly zoma 22 febroary tetsy amin’ny MPE Nanisana ny fisian’ilay foara lehibe momba ny fiompiana sy ny jono ary ny fambolena andiany faha-11.

Hotanterahina etsy amin’ny kianja MAKIS Andohatapenaka izany nanomboka ny 30 mey hatramin’ny 2 jona ho avy izao. Mpitsidika miisa 30 000 no handrasana ary trano eva maherin’ny 200 no ho hita eny hahitana ireo vokatra avy amin’ny mpamokatra samihafa, fitaovana sy kojakoja, zezika sy masomboly, fanafody natokana ho an’ny fambolena sy fiompiana. Hanome lanja tanteraka ny tontolo ambanivohitra izany ary hisy ny fizarana traikefa sy fiofanana maimaimpoana. Hampiavaka an’ity FEPA faha-11 ity ny hisian’ireo mpampiranty maro avy any ivelany sy ny famelabelarana arahina adi-hevitra mahasika lohahevitra mahaliana maro. Hohezahina amin’ity hetsika ity ihany koa ny fanamorana ny fitsidihan’ny mpianatra izay hita mbola ambany eto amintsika. Mahavelom-bolo ny tantsaha ny hetsika tahaka izao satria tsy vitan’ny mitsidika fotsiny ny olona fa tena maro hatrany ny mandray anjara mividy mihitsy ireo entana amidiny. Ny teny filamatra amin’ity hetsika ity moa dia ny hoe “ Ny fiompiana, ny jono ary fambolena: fototry ny fampandrosoana lovain-jafy an’i Madagasikara”.

Tsirinasolo