Actualités

Fifaninanan-kira “The voice” Nampiaiky volana ny mpitsara ireo tanora Malagasy

Actualités
Alatsinainy 02 Martsa 2020

Taitra ny rehetra fa naheno hira malagasy " Ravoravo ", hiran`i Mika sy Davis, teo amin'ny fandaharana The voice ny sabotsy 29 febroary lasa teo ka nofidian'ireo mpanakanto kalaza frantsay,

Pascal Obispo sy Amel Bent. Nampiteny ny anarany i Ludy Soa sy Nathan nandritra ilay fifaninanana satria dia kanto ny feo ary ny fihetsika teo amin`ny sehatra dia lavorary. Niaiky ireto mpitsara fa tena manana talenta sy mahay mihira ireto tanora Malagasy ireto. Raha ny momba azy mianadahy dia teratany Malagasy mila ravinahitra any Frantsa izy ireo, zafikelin'i Zoky Jean Andrianaivo Ravelona, izay mpanao hosodoko malaza. Tsy tao Frantsa ihany no nanakoako ny lanjan`i Madagasikara fa dia nampihetsi-po ihany koa ny seho natolotr`i Miandry, nindrana an`ny Spirit izay hiran`i Beyonce Knowles, nandritra ilay fifaninanana an-kira “The Voice Afrique Francophone” andiany fahatelo izay tontosaina atsy Afrika Atsimo. I Miandry moa fony vao tanora erotrerony 10 taona mahery dia efa anisan’ireo ankizy sy tanora nandrafitra ny tarika GMMC fantatra tamin’ny hira fiderana. Ireo mpanakanto kalaza toa an’i Lokua Kanza, Charlotte Dipanda, Nayanka Bell ary Hiro no mpitsara tamin`ity fifaninanana ity. Samy niaiky ny rehetra fa samy hanana hoavy mamiratra eo amin’ny sehatry ny kanto izy 3 mianadahy ireto any aoriana any. Maro ny Malagasy no manana talenta sy mahay mihira. Tsara rahateo ny fananana tanora feno fandavan-tena izay mikatsaka hatrany hampiseho ny fahaiza-manaon`ny Malagasy.