Actualités

FIARAHA-MITANTANA NY ILES EPARSES ?

Actualités
Alakamisy 02 Oktobra 2014

Fiaraha-mitantana no ho lamaody ? Fiaraha-mitantana no hita fa mety ? Satria ianareo tena kaody dia kaody, Raha vao manontany ny mpanao gazety ?

Dia tompony nefa dia hangataka atiny.

Tompony nefa dia tena jambena ?

Miomàna sakaiza fa “hihinan`ny fatiny”

Raha ny olon-kafa no hifehy ny an`ny tena.

Fa hay ianareo efa tena mandady

Sy tena mikimpy ary mandeha an-jamba ?

Ry “hery mampiesona” o ! sao any an-kady

Vao hoe hiantso vonjy sy hanofa lamba.

… Zahay koa hitaky fiaraha-mitantana

Ny “tokantrano” sy ny ao aminao,

Ka hangataka sady hiteny mivantana

Hoe ny an`ise re mba zarazarao.

Fa fiaraha-mitantana izany no tsara

Ka hiara-mitantana isika rehetra:

Na vady na vola , iaraha-mizara.

Fiaraha-mitantana no tarigetra.

DADAN`I ZINA (01-10-14)