Actualités

Partagé sur :
• facebook

Hanome fitaovana maimaimpoana ny tafika malagasy ny fanjakana Rosianina. Hisy ihany koa manampahaizana Rosianina hamboatra ireo fitaovana simba nomen’ity firenena ity fahiny.

Maimaimpoana avokoa izany  rehetra izany, raha ny fanazavan’ny praminisitra  Ravelonarivo Jean  nandritra ny fihaonany tamin’ny kolonely Oleg Bugro, iraky  ny  minisiteran’ny  fiarovana  Rosianina sy miandraikitra ny  fiaraha-miasa  eo amin’ny samy firenena. Tamin’ny  andron’ny amiraly  Ratsiraka  nandritra ny Repoblika faharoa no  tena niroborobo  ny fiaraha-miasan’i Madagasikara sy Rosia, indrindra tamin’ny  ara-tafika dia izao  izy miverina  izao indray  rehefa  ny jeneraly  Ravelonarivo  Jean izay  olon’ny amiraly no sady nandranto fahalalana tamin’ny  familiana fiaramanidina tany  Rosia  no praiminisitra. I Rosia na ny firaisana Sovietika (URSS) tamin’ny fotoan’androny no namatsy basy Kalachnikov ny tafika Malagasy miaraka amin’ny bala, ary io no basy betsaka indrindra misy eto amintsika, izay sady ampiasain’ny mpitandro ny filaminana no ampiasain’ny jiolahy. Tsy  misy kisendrasendra  izany amin’ny  raharaham-pirenena fa misy  antony avokoa  ny zava-drehetra. Ny  firenena Rosianina  koa tsy hanome zavatra  maimaimpoana ny tsy  taovany tsy volovolony fa ao  tambiny andrasany. I Rosia  izay  mifanenjana  amin’ny firenen-dehibe maro  any Eoropa sy  any Amerika ka dia ho hita eo indray hoe hitondra an’i Madagasikara  ho aiza ity  fiaraha-miasa ara-tafika amin’i Rosia  ity ?

Tia Tanindrazana

Samia mijoro ho an'i Gasikara.