Actualités

Partagé sur :
• facebook

Manao antso avo amin’ny fikambanana sendikaly rehetra misy ireo mpikambana sendikaly miombona ao amin’ny USAM na ny « Union des syndicats autonomes de Madagascar » mba haneho firaisankina amin’i Oliva Andrianalimanana,

mpitarika sendikaly eo anivon’ny Jirama  izay nampidirina am-ponja ny  zoma lasa teo  taorian’ny nampahafantaran’izy ireo fa mitohy ny  fitokonan’ny mpiasan’ny Jirama. Fanaovana  taratasy fisoratam-panambadiana sandoka mba hahazoana fiantohana  ara-pahasalamana no anenjehana an’i Oliva Andrianalimanana ka izay no  nampidirana  azy am-ponja vonjimaika mandra mpiandry ny fitsarana azy izay mbola amin’ny 11 novambra  ho avy izao. Manahy kosa ireo mpikambana sendikaly fa misy ifandraisany amin’ny  maha mpitarika fitokonana eo anivon’ny orinasa Jirama ny tenany  izao antony  nampidirana an’Atoa Oliva ho  MD  avy  hatrany izao. Raha araka ny  vaovao  voaray dia efa tamin’ny volana martsa no nisehoan’ity raharaha  ity ary efa nisy fanadihadiana natao. Ankehitriny  amin’izao  fotoana mampivaivay ny fitakian’ny  mpiasan’ny  Jirama ny fialan’ny tale jeneraly sy ny fandravana ny filankevi-pitantanana izao no mivoaka ny didy  fampisamborana. Manoloana  izany rehetra  izany  dia  manao antso avo amin’ny  mpikambana  sendikaly rehetra eto an-toerana sy eo anivon’ny  iraisam-pirenena ny USAM mba  hanavotana an’i Oliva Andrianalimanana sy  mba hangatahana ho azy ny fahafahana vonjimaika.

Andry Ratovo

Tia Tanindrazana

Samia mijoro ho an'i Gasikara.