Actualités

Fanafenana an’i Tania kely Olona iray nidoboka am-ponja

Actualités
Alarobia 20 Novambra 2019

Nokarohina tamin’ny alalan’ny finday nifampiantsoana no nahafantaran’ny polisy fa tany Antanifotsy i Tania kely ka hita afak’omaly atoandro ary tonga teto an-drenivohitra tamin’ny 5 ora harivan’ny alatsinainy teo.

Ny sipan’ny dadany ihany moa no naka an’i Tania, ilay zazavavy kely vao 10 taona monja nanjavona teny Avarabohitra Soavimasoandro ny 11 novambra lasa teo, rehefa avy nirava tamin’ny 11 ora atoandro tany am-pianarana. Raha araka ny fanazavan’ity Ramatoa renikelin’i Tania ity tamin’ny mpitandro ny filaminana dia nisy famaliana faty ny dadan’i Tania no antony nanosika azy hanaotao foana tahaka izao. Nisy fotoana mantsy izy nitoe-jaza, raha ny fitantarany. Nampijalian-drain’i Tania fatratra anefa izy tamin’izany, hono, novonoiny… ka afaka ilay zaza tao an-kibony. “Nataoko tsapany koa izany hoe : very zanaka izany”, hoy ilay vehivavy izay mbola nanamafy fa izay ihany no antony nitondrany an’i Tania nitsoaka. Na izany aza salama tsara izy. Tsy misy ahiana ny ainy. Raha ny vaovao farany dia nahazo fahafahana vonjimaika ny rehetra afa tsy ilay nitondra azy nitsoaka izay naiditra am-ponja vonjimaika.

Pati sy Hajanirina