Actualités

Fanadiovana sy fisamborana Sao dia tsy antonona intsony Antanimora sy Tsiafahy ?

Actualités
Alatsinainy 04 Martsa 2019

Tsy antonona intsony Antanimora sy Tsiafahy, raha izay mpiasam-panjakana nanao afera no ampidirina am-ponja vonjimaika avokoa. Maneho endrika firosoana amin’ny fanadiovana ny fitantanan-draharaham-panjakana ny mpitondra ankehitriny.

Raha tena tanterahina anatin’ny fanadiovana tena izy tokoa io, fa tsy misy ambadika politika, dia azo antoka fa maro no mety ho any Ambaniatsinanana ankoatra ireo mety ho very asa. Raha ny volam-panjakana very tamin’ireny rahateo mety tsy voakaonty intsony. Mandeha ny kitranoantrano samihafa amin’ny fampidirana mpiasam-panjakana. Ny kolikoly tsy ferana intsony, ary tato anatin’ny fanjakana roa farany nifanesy no tena nampanjaka izany, dia ny tetezamitan-dRajoelina sy ny fitondrana Rajaonarimampianina. Kazaran’ny tsy an-kitsitsy ny fanenjehana samihafa amin’izao eo anatrehan’ny raharaha maloto tamin’ny fitantanana raharaham-panjakana, saingy mandeha ila aloha io, ka ny olon’ny fanjakana HVM no tena lasibatra. Amin’ny endriny iray, dia toa tafiditry ny valifaty politika ny raharaha satria raha afera maloto sy kolikoly avo lenta izany, dia tsy vao izao efa nanjaka tamin’ny andron’ny tetezamita saingy tsy mba misy olony voakitika. Fomba fiady hoenti-mandresy lahatra ny mpamatsy vola fa miady amin’ny kolikoly sy mametraka ny fanjakana tan-dalàna sy tsara tantana ihany koa anefa ny tahaka izao.

Toky R