Actualités

Fampihorohoroana sy famonoana mpanao gazety frantsay Manameloka izany ny Holafitry ny mpanao gazety malagasy

Actualités
Alakamisy 08 Janoary 2015

Omaly alarobia mitataovovonana tao amin�ny foiben�ny gazety Charlie Hebdo tao Paris dia olona miisa 12 no indray maty noho ny herisetra sy ny sompatra nataon�ny mpampihorohoro�

Olona roa nitana fitaovam-piadiana mahery vaika no niditra an-keriny tamin’ity birao fanaovan-gazety ity, ary nanao ny danin’ny kibony tamin’ny tifitra variraraka. Efa tonga teny amin’ny foiben’ny gazety avy hatrany ny filoha frantsay Hollande nijery ny zava-misy. Tsy mazava loatra ny anton’ny famonoana fa mbola mandeha ny fanadihadiana ataon’ny manampahefana frantsay. Mpanao sary itatra malaza toa an-dry Cabu, Charb, Tignous no nindaosin’ny fahafatesana omaly io.

Noho izany indrindra dia manameloka ny herisetra atao amin’ny mpanao gazety ny holafitry ny mpanao gazety malagasy, hoy ny filohany Rakotonirina Gérard, na inona na inona anton’izao famonoana izao. Tsy misy antony tokony hanaovana herisetra amin’ny mpampahalala vaovao na koa hilana vaniny amin’izy ireo noho ny famitany ny asany. Aoka ny herisetra hitsahatra sy tsy hahazo laka eto amin’izao tontolo izao fa izany ihany no mahatonga ny fihemorana eo amin’ny fandrosoan’ny zanak’olombelona. Marina fa aty lavitra isika, hoy Rakoronirina Gérard, kanefa zava-dehibe ho amin’ny fiarovana ny asa sy ny hasarobidin’izany ny fanamelohana ny fisehoan-javatra toy itony.