Actualités

Partagé sur :
• facebook

Andro vitsy sisa isaina dia hivalona any amin’ny varo-tsy mifody ny taona 2015. Hifarana amin-dromoromo anefa raha ny zava-mitranga etsy sy eroa no zohina.

 Raha natao litania tany amin’ny fiandohan’ny taona ny fampihavanam-pirenena, dia tsy misy mpiresaka intsony, toa zary fady ny fitondrana Rajaonarimampianina mihitsy aza ankehitriny. Manangan’ady etsy sy eroa indray aza no ataon’ny HVM. Mifandimby lasibatra amin’izany i Marc Ravalomanana sy ny fianakaviany, ary faramparany izao i Andry Rajoelina sy ny Mapar tarihiny.

Sambany

Efa tsy nihevitra ny hiroso amin’ny fampihavanam-pirenena ireo zanaky ny tetezamita, anisany izao fitondrana HVM izao, na dia voalazan’ny tondrozotra izay efa lasa lalàna manan-kery aza ny hanatanterahana azy. Ny fahatongavan’ny filoha Marc Ravalomanana tampoka an-tanindrazana ny 12 oktobra 2014 no nampikoropaka ny rehetra, fa tsy azo ihodivirana ny fampihavanam-pirenena. Nantsoina ny FFKM handray an-tanana ilay izy. Tetsy an-kilany, ny iraisam-pirenena dia nametraka ny fanatanterahana io fampihavanam-pirenena io, ho fepetra hahazoana famatsiam-bola. Sambany, nanomboka tamin’ny 19 desambra 2014 no nifanatri-tava sy nihaona an-databatra boribory ireo filoha dimy, dia ireo filoham-pirenena efatra Hery Rajaonarimampianina, Didier Ratsiraka, Zafy Albert ary Marc Ravalomanana niampy ny filohan’ny tetezamita Andry Nirina Rajoelina. Fihaonana in-8 miantoana no tontosa, notarihin’ny FFKM nanomboka teo. Nisy ny natao teny amin’ny hotely kintana 5 eny amin’ny CCI Ivato ny sasany tao amin’ny Palais des Sports Mahamasina.

Nisy fanontaniana 33, novolavolain’ny SEFIP ary nomen’ny FFKM azy dimy lahy hovaliana, handrafetana ny fototry ny fampihavanam-pirenena tian-kapetraka eto amin’ny firenena. Nitarina tany amin’ny faritra ny fihaonana ary naravona nandritra ny fihaonambem-pirenena teny amin’ny CCI Ivato tamin’ny volana aprily sy fiandohan’ny volana mey 2015.

Nitsoaka an-daharana

Nahatratra 19 takila ny fehin-kevitra ary nisy vaomiera roa natsangana hanara-maso ny fampiharana izay tinapaka. Teo dia efa nitsefotra ny raharaha, satria tsy tonga nanao sonia ny fehin-kevitra nivoaka tamin’izany ny Pr Zafy Albert sy Andry Rajoelina. Zaran’ny fitondrana HVM aza nisy an’izany fitsoahana an-daharan’ny mpandray anjara sasany izany, ka dia nataony tsara tahiry any anaty vatasarihana ihany koa ny fehin-kevitra nankatoavin’ny mpizaika an’arivony teny amin’ny CCI Ivato. Zary fampiesonana ihany koa ny kabary tsara lahatra nifanesy ny sabotsy 2 mey 2015, andro famaranana ny fihaonambem-pirenena. Tsy voajoro ara-panjakana hatramin’izao ireo komity roa tokony hanampy sy hanara-maso ny fampiharana ny fehin-kevitra. Nihevitra anefa ny Malagasy fa pejy vaovao eo amin’ny tantaran’i Madagasikara no nisokatra nanomboka ny sabotsy 2 mey 2015, nifaranan’ny fihaonambem-pirenena. Dingana lehibe no vita, namelona indray ny fanantenana ao am-pon’ny tsirairay ary nandrehitra ny afon’ny fitiavan-tanindrazana ny fahitana fa azo atao tsara ny mifanazava, mifamela ary miasa miaraka ho amin’ny fampandrosoana ny firenena.

Jean D.

Tia Tanindrazana

Samia mijoro ho an'i Gasikara.