Actualités

Fako mivangongo etsy sy eroa Tsy hisy intsony, hoy i Roland Ravatomanga

Actualités
Alarobia 20 Aprily 2016

Anisan�ny mampitaraina fatratra ny mponina teto Antananarivo Renivohitra teo aloha teo ny fivangongoan�ny fako tetsy sy teroa

. Tsy hisy intsony izany, hoy ny minisitry ny rano vaovao Roland Ravatomanga omaly. Anisan’ny asa laharam-pahamehana hiantsorohany mantsy izany ho fanampiana ny kaominina. Tsy Antananarivo irery anefa no hahazo tombony amin’izany fa ny renivohi-paritany rehetra mihitsy ho fitsinjovana ny vahoaka. Ankoatra izay dia nampanantena ny handray an-tanana ny famahana ny olan’ny delestazy ihany koa ny tenany. Hisy ny fihaonana amin’ireo tompon’andraikitra ambony isan-tsokajiny ka anisan’ny hohamafisina ny fanomezan-danja ny lafiny ara-teknika amin’ny maha teknisianina ny tenany. Tsy ho latsa-danja amin’izany ny fijerena akaiky ny lafiny fahadiovana sy fidiovana izay tena ilain’ny mponina tokoa. Na izany aza anefa dia miantso ny mponin’Antananarivo Renivohitra ny tenany mba samy hahalala madio satria mahamenatra raha renivohitr’i Madagasikara no feno fako mivangongo izay tsy andraikitry ny minisitera sy ny kaominina irery fa adidy iaraha-manana. Tontosa omaly teny Ambohijatovo ny famindram-pahefana teo aminy sy ny minisitry ny rano teo aloha Ndahimananjara Johanita, minisitera izay nambarany fa tsy vahiny aminy intsony.

Patty